This post is also available in:
English
Ola futuru konservasaun sira,
Ida ne’e hanesan jornada husi hau-nia servisu hamutuk ho Blue Ventures iha Timor-Leste.
Iha Tinan 2018, hau hare’e oportunidade servisu ne’ebe oferese husi Blue Venturse kona-ba serbisu Administrasaun ninian no hau hanoin katak hau bele hala’o serbisu ida ne’e, entau hau koko aplika no hau senti kontenti tebes wainhira hau hetan seleksionadu ba serbisu ne’e . Hau hakarak tebes atu serbisu ho Blue Ventures tanba iha momentu ne’eba hau seidauk bele kontinua hau nia estudu ba nivel universitariu no hau hatene katak hau sei aprende buat barak iha organizasaun hanesan ne’e. Tuir hau-nia perspektivu, Sistema edukasaun balu iha Timor sai hanesan obstakulu ba joven sira atu kria futuru ne’ebe diak. Ezemplu; kurikulum husi eskola balu la prepara estudante ba era globalizasaun ne’ebe maka agora dadauk ita hela ba (era ne’ebe domina ho teknolojia). Dalaruma professor/a la hanorin tuir area kunesimentu sira nian, entaun bele fo impaktu ba estudante sira. Maibe agradese tebes, tanba agora buat barak mak hahuu iha mudansa no Sistema edukasaun mos sai diak liutan.
Wainhira hau hahuu servisu iha Blue Ventures, hau serbisu hanesan asistente administrasaun no operasaional. Hau nia serbisu mak hanesan haree ba visa aplikasaun, karta arkivu, no serbisu administrasaun seluk. Ema balu bele iha hanoin katak, ida ne’e hanesan serbisu ida ne’ebe ema hotu-hotu bele halo, maibe hau nafatin agradese, fo dedikasaun no mantein etika serbisu, maske hau hanesan parte kiik deit husi ekipa Blue Ventures. Hau fiar katak, la importa ba serbisu saida deit mak ita halo kuandu ita iha iha paixaun no attitude ne’ebe diak. (Servisu hotu hanesan de’it)
Dalaruma hau hetan oportunidade atu envolve aan iha servisu konservasaun nian hodi serbisu hamutuk ho ekipa komunidade halo monitorizasaun peska nian no hola parte iha enkontru komunidade kona-ba manejamentu mariña, iha Atauro ho Manatutu (Behau no Ma’abat). Hau hahuu ho knar kiik hanesan organiza transporte, oferese pulsa telemovel ba ekipa monitorizasaun peska no halo mos tradusaun tetun ba hau-nia belun hirak ne’ebe koalia lian ingles. Liu husi responsibilidade foun ida ne’e , hau serbisu besik liu tan ho ekipa konservasaun no hahuu dedika hau-nia tempu barak liu iha area konservasaun. Hahuu husi ne’e hau aprende barak ona kona-ba konservasaun mariña no bele ona fahe hau-nia kuñesimentu ne’e ba komunidade sira ne’ebe ami serbisu hamutuk. Eventualmentu, hau bele asumi kargu foun nu’udar Conservasaun Officer ba Blue Ventures iha Timor-Leste.
Wainhira hau hahuu servisu ho Blue Ventures hau bele haree katak iha ekipa ida ne’e iha duni komitmentu hodi halo sira-nia servisu hamutuk ho komunidade kosteira sira, maibe iha dezafiu balu ne’ebe maka halo hau preokupa ho hau-nia servisu. Ezemplu; hau-nia abilidade lian ingles ladun diak no dalaruma difisil atu halo komunikasaun. Hau mos la fiar aan atu koalia iha ema barak nia oin (hanesan enkontru ho komunidade) tanba hau la toman ho ida ne’e. Maske nune’e, hau hetan inspirasaun husi belun sira ne’ebe maka oferese sira nia aan ba servisu ho komitmentu, dedikasaun no entuziasmu. Partikularmente hau hetan enkoraja husi hau-nia belun Timoroan, Mima no Amos ne’ebe serbisu makas tebes liu husi sira ninia treinamentu ne’ebe ho prosesu naruk (Ema espesifiku de’it maka bele halo ida ne’e). Wainhira sira hahuu serbisu ho ekipa iha tinan 2016, sira seidauk kuñese SCUBA diving no konservasaun maibe oras ne’e sira mak hanorin fali abilidade hirak ne’e ba ema seluk. Kuandu hau haree ida ne’e, hau hahuu tau konfiansa mai hau-nia aan. Hau hanoin, sekuandu sira bele halo, tanba sa hau labele? Prosesu ne’e sei la fasil sekarik hau mesak, maibe hau iha ekipa maravilloza ne’ebe maka sempre suporta hau!
Hau mos hetan motivasaun husi hau-nia belun Jenny, Kordenadora Konservasaun iha Blue Ventures Timor-Leste. Maske nia ho idade kiik no halo serbisu ne’ebe ema barak la haree, nia hanorin ona hau buat barak kona-ba oinsa atu nafatin tau prioridade uluk ba komunidade sira. Nia husik nia tempu barak atu hanorin no suporta hau, nomos fo ona oportunidade barak mai hau atu dezenvolve no hakat tan ba oin. Liu husi hau-nia jornada ida ne’e, hau hakarak uza oportunidade atu fahe hau-nia istoria no enkoraja joven iha Timor-Leste. Hola parte husi ekipa ida ne’e, hau haree ona katak, maske ita halo serbisu ne’ebe ema labele haree maibe ita nafatin iha mehi ne’ebe boot no ida ne’e bele lori mudansa pozitivu.
Hau agradese ba oportunidade hodi serbisu hamutuk ho ekipa ida ne’e, ema ne’ebe maka serbisu makas no dedika sira-nia aan ba komunidade konservasaun nian. Alem husi sira-nia kapasidade professional, ami mos dezenvolve amizade ida ne’ebe diak. Liu husi jornada ida ne’e, hau hahuu hadomi tebes serbisu ho Blue Ventures. Hau senti sorte tebes hodi hetan oportunidade professional hirak ne’e, nomos hetan biban atu bele hasoru belun internasional sira ne’ebe mai vizita ona Timor-Leste hodi fahe sira nia matenek no esperensia. Hetan vizita husi sira, enkoraja ona no fo mai hau vizaun ba futuru ne’ebe diak ba komunidade sira ne’ebe ami serbisu ba.
Buat ida ne’ebe hau gosta tebes iha hau-nia serbisu maka servisu direitamente ho komunidade lokal atu konserva sira -nia rikusoin tasi nian. Hau fiar katak, hau mos sai ona parte ki’ik-oan ida ne’ebé kontribui ba ha’u-nia nasaun, nomos inklui mundu hodi hare’e ba futuru ne’ebe diak liu ba envairomentu tasi nian. Mezmu hau-nia background edukasaun nian laos iha area konservasaun mariña, hamutuk ho hau-nia belun iha Blue Ventures, hau fiar katak loron ba loron hau bele aprende barak liu tan no kontribui ba vizaun kona-ba futuru ne’ebe diak ba komunidade kosteria sira. Dadaun ne’e, hau aprende ona kona-ba oinsa atu Snorkel no Scuba Dive, estuda kona-ba manejamentu peska no dezenvolve abilidade iha lideransa no komunikasaun.
Hau hakarak hatoo hau-nia agradese ba hau-nia belun husi ekipa membru Blue Ventures Timor-Leste no hau-nia belun sira hotu ne’ebe fahe mai hau sira-nia kuñesimentu, kreatividade no perspektiva. Ida ne’e sempre motiva hau iha hau-nia servisu. Maske hau halo servisu ruma mesmu ki’ik ho neineik maibe beibeik no iha rezultadu ne’ebé iha nia signifikadu no benefisiu ba ema barak iha Timor-Leste no mundu tomak.
“Fiar de’it katak! Loron ida, ita nia servisu no esforsu tomak sei selu-kotuk”
